احيانا الواحد بيحس انه عايز يتكلم ويطلع اللي جواه
ومن كتر ضغوط المجتمع بقي الاحتياج لتفريغ الكلام كتيييييييير قوي
فضفضة
كلمة معناها انك تقول كل اللي جواك مهما كان التعبير
انفعال وحكايات وتخاريف ف الكلام احيانا
بس الاهم انك تلاقي الصدر اللي يتسع لكل دا
واللي في نفس الوقت يكون صندوق مقفول مايطلعش اللي جواه لاول واحد يقابله
انما انك تحس براحة مع حد وتطلع كل اللي جواك وتفرغ شحنتك كلها علشان ترتاح او حتي تكون بتفكر قدامه بصوت عالي
وانت واثق انك كأنك بتحكي مع نفسك وتتفاجئ بأن كل اللي قولته لنفسك طلع بره
ومش بس كدة دا اتعمل عليه حوارات وحكايات وقصص انت اصلا لا سمعت عنها ولا حصلت منك ولا حتي حصلت قدامك
ومش قادر تصدق ان الملاك اللي كان قدامك وانت بتحكي هو نفسه الشيطان اللي كان بيسرد قصص عن لسانك سيناريو وحوار من تاليفه واخراجه والحبكة الدرامية لو مكنتش انت صاحب الموضوع كنت صدقته
سبحان الله
الله الله الله
هو دا بس سبحانه اللي ممكن تحكي له وتفضفض ويكتم سرك ولا يفشيه ومش بس كدة دا يطبطب عليك ويهون ويبعت لك الملايكة يمسحو دموعك ويعوضوك عن الالم ويبدل حزنك وهمك فرج
قول يا الله وبين ايديه هو بس تحكي بكل لغات العالم هو عالم ومطلع
وهو اللي عالم بالخبايا والاسرار اللي عندك وعند غيرك
