الأربعاء، 22 أبريل 2009

حكاية ( جاون)2

السلام عليكم
نكمل حكاية الجاون اللي بديتها المرة اللي فاتت المرة دي خلاص بقي هانت مش هايتغير معاد العملية ولا هايتاجل تاني اديني هاحكي اللي حصل انا عايزة اقولكم اني لما رحت للدكتور اللي حولني علي الجامعة ده وقالي انه مفيش حل غير العملية

انا قولت العملية دي هاتكون مركبة يعني تلات عمليات مرة واحدة يشيل اللوز اللي تعبتني قوي من تضخمها وكتر
التهابها ويعالج الحاجز الانفي العلوي ويعدل الحاجز البلعومي ده واللا معرفش اسمه ايه
اللي هو اساس التعب كله بس لما جيت رحت الزيارة قبل العملية في المعاد الجديد وقابلت الدكاترة النواب الطيبين سالت واحد منهم كان باين عليه طيب قوي بجد عن ان كانت العملية مركبة واللا حاجة واحدة قالي الدكتور باعت الورقة فيها حاجة محددة لو فيه اي مشكلة ارجعي للدكتور الكبير تاني المهم رحت للدكتور الكبير في العيادة وحاولت اقابله ومعايا كل الورق والاشعات البيه الممرض اللي علي باب العيادة قالي مش مسموح ليكي تدخلي

واخد مني الورق ودخل هو للدكتور وطلع بعد ثواني قالي الدكتور بيقولك مينفعش تعملي التلاتة هي واحدة بس وبعدين نشوف قولت ماشي ورجعت تاني يوم الصبح محضرة نفسي للعمليات تاااااااااااني من الساعة 8 صباحا وانا في مبني العمليات بس المرة دي قولت مش هاخلع ملابسي خلعت الجاكيت فقط
ولبست الجاونين خلف خلاف زي التمريض ما طلب بس علي اللبس وقولت هابقي اخلع لبسي لو فيه مشكلة قبل ما ينادو عليا للعملية التاريخ كان 22 يناير 2008 الساعة 1 تقريبا نادو عليا واخدتني ممرضة عشان انزل للعمليات
يااااااااااااااه تاني مرة المرة دي بجد بقي دخلت العملية نامي علي السرير ده انا قصيرة مش طايلة اطلع علي سرير العمليات جابلي كرسي وطلعت عليه ونمت وسالني الاسئلة اللي كنت بسمعها من اصحابي ا
للي دخلو عمليات اسمك ايه كام سنة وحاجات من دي بس مقليش عدي واحد اثين تلاته لا قالي اهدي خالص والدكتورة ضربت الابرة بتاعة الكانيولا في ظهر ايدي
طلعت من الناحية التانية يعني غلط وعملت نزيف في ايدي مسحتها بالمنديل اللي في ايدها والممرض عطاها غيار جراحي تحطها علي الجرح وجاه دكتور تخدير تاني ورفع الكم وحط الابرة في الوريد اللي في دراعي وانا كل اللي طلع عليا يارب استغفر الله العظيم وشوية ادعية سريعة وايات قرانية ودعاء للناس اللي افتكرتهم وفجاة حسيت بشي صعب بيسحب روحي من صدري ورحت عن الدنيا
فتحت عيني بعد ساعتين لقيت شعري مكشوف هههههههههههه اااااااااااااه
كل اللي حسيت بيه اني شعري مكشوف واني متلجة من البرد ناديت اه يارب ردت عليا الممرضة اللي بتابع حالتي قولتله شعري الطرحة الحجاب التمرجي حط الطرحة علي راسي يغطيها وقالي متخفيش انتي اختنا يلا عشان هاتطعلي فوق
غمضي عنيكي نقلني علي الترولي وفي دقيقة كنت فوق في نفس الغرفة اللي نزلت منها وعلي نفس السرير كانت ماما منتظراني والحمد لله يا جماعة انها جت علي قد كدة المهم بعد ساعة جاني الدكتور بعد ما خلص باقي اللسته
وجه وقت المرور علي الحالات عطاني تقرير لحالتي ومواعيد الزيارة للغيار علي الجرح والمتابعة وروشتة العلاج اللي طبعا هاشتريه من بره يعني كاني عملت العملية في مستشفي خاص بس هاخرج في نفس اليوم ومشيت بعد ساعة تقريبا
يااااااااااااه علي اللي حصل تصورو مفيش نخوة في سواقين التاكسي مش راضيين يقفو وانا ماشية وماما وخالتي سانديني ووشي وارم فيه اللزق اللي مالي وشي تقريبا وبيقول اني محتاجة مساعدة وعاملة عملية تصورو دي كمان كانت مصيبة اني مشيت لحد ما عديت الكوبري المخصص للمشاة عشان نلاقي اي حد يوصلنا والناس كلها رافضة
سبحان الله والحمد لله ولا اله الا الله والله اكبر الحمد لله اني لسه عايشة
والحمد لله لقيت سواق تاكسي صعب عليه حالي ووافق يوصلني بس طبعا بشرط اولا الاجرة المضاعفة ثانيا انه مش هايدخل بيا الشارع بتاعنا الضيق المهم انه وافق ووصلت لشارعنا
اشوفكم علي خير المرة الجاية في متابعة لرحلة العذاب

الثلاثاء، 14 أبريل 2009

حكاية ( جاون)

الحكاية ابتدت في الشتا قبل الماضي
العيادات الخارجية الدور الخامس بالمستشفي قسم الانف والاذن
طبعا قطعت التذكرة ام اثنين جنيه وسجلتها في مكتب التسجيل وقعدت انتظر الدور
زحمة وشبابيك مقفلة وناس مريضة وناس مرافقة
وفرصة العدوي ياااااااااه
مطولش عليكم
الدكتور كشف وشاف الاشعة وقالي انتي جاية بورقة من
عند الدكتور الكبير يبقي خلاص اخدتي دور في العمليات تيجي من بكرة الصبح الساعة 7 تقفي هنا ومعاكي ورقك عشان تعملي العملية بعد بكرة خلاص اوكي .. اوكي يا دكتور
وتاني يوم من النجمة كنت هناك واخدت الدور وكان فيه غيري كتير من اللي جايين من طرف الدكتور الكبير اه نسيت اقولكم انه بالاساس عشان تاخد الدور بسرعة لازم تروح لدكتور كبير زي الدكتور بتاعي كدة وهو يبعتك بروقة الروشتة بتاعته محدد فيها التشخيص واسم العملية ( واسطة يعني ) المهم كشف تاني وعطاني معاد قالي مش بكرة هاتعملي لان اللسته بكرة مليانة

هاتعملي يوم الخميس الجاي تيجي يوم الاربعاء عشان نعملك التذكرة الخاصة بالعمليات وتدخلي اللستة
حاضر ونفذت وحصل نفس الشي
اللي هو رحت يوم الاربعاء المحدد وعملت الكشف تااااااااني وعملولي تذكرة خاصة بالعمليات وانزلي بقي استني في مكتب التسجيل تحت لحد ما تيجي الممرضة معاكي عشان تدفعي التامين الخاص بالعملية يلا يوم العملية الصبح اللي بدا من الساعة الواحدة صباحا صيام صيام توقف عن الاكل والشرب بناءا علي تعليمات الدكتور وصلت المستشفي الساعة الثامنة صباحا وطلعت الدور السادس قسم الانف والاذن كنت فاكرة اني طالعة العمليات ..... معلش اصلي دي اول مرة ادخل فيها عمليات نادت علينا العاملة يلا بسرعة غيروا كلكم الملابس والبسوا الجاونات الرجال في الغرفة دي والسيدات في الغرفة دي كله بسرعة دخل استلم اثنين جاون
الجاون ده الروب المخصص للعمليات
ولازم لازم تخلع ملابس كلها ماتترك شي
احنا في ديسمبر والبرد قارص في الصباح الباكر ولكنا سمعنا واطعنا نادت علي اول اثنين في اللسته رجل وسيدة ثم بعدها بربع ساعة نادت علي طفلة كل هذا ونحن فقط جميعا بالاثنين جاون
فقط روب من القماش الخفيف المفتوح من الظهر واخر تردتيه بالعكس ليكون مفتوح من الامام نسيت اول ان الجاون المخصص للعمليات المفروض يكون معقم والمفروض يكون مكوي لكن الحقيقة
متسخ باثار الدماء من المريض الذي سبقني في اليوم السابق مثلا ورائحة الجاز تفوح منه لانه كان في برميل النظافة علي يمني طفلة كانت ترتدي جاونات مخصصة للاطفال ولكن بالاضافة الي الوصف السابق كان الجاون ايضا مقطوع او متقطع
الله ...
سامحوني
استسلمت للامر ولم استطع التحدث ولم اجد من اتحدث له البرد شديد هذا حالي فمابال الاطفال الموجودين معي في اللسته وحالهم اسوا من حالي وكل الحكاية عملية استئصال اللوزتين مثلا للطفل يعني الامر لا يستدعي كل هذا التعذيب الوقت يمر
الساعة وصلت الواحدة
وكل ساعة ينادو فقط علي اثنين
حتي تبقي اربعة من اللسته
وتوقفت الساعات وتوقفت النداءات
ماذا حدث
عملية كبيرة استغرقت وقت طويل والدكاترة تعبو .. ( هذا ما قاله فريق التمريض والعمال في العمليات )
الساعة الثانية والنصف نادوني انتي لسه هنا يلا عمليات فورا بسرعة الدكاترة بينادو عليكي ونزلت ...
حافية عارية لا البس الا الجاون اشعر ان دمي متجمد من البرد دخلت قسم العمليات فوجدت قائمة انتظار اخري الاربعة السابقين ليه لايزالو في الانتظار ولكن علي باب غرفتين العمليات
يا الله
لطفا انتظرت حتي قرابة الساعة
من الثامنة صباحا حتي الثالثة وانا بهذه الجاون المتسخ الردئ ولا استطيع ان ارتدي حتي الجاكت فوقه ولا استطيع شرب ماء او شاي ساخن حسبي ربي
وفجاة
يظهر احد الاطباء النواب الطيبين في القسم وينادي: " فين مني ؟؟ تعالي يلا ، نبيلة انتي عمليتك هاتتاجل معلش ، مش انتي لوحدك يعني الباقي كله معاكي "
معلش بقي مكناش عارفين ان العملية دي هاتطول قوي كدة هاتي تليفونك ولو لقينا ليكي مكان الاسبوع الجاي هانتصل بيكي بس عموما تيجي بعد شهر يوم 20 يناير
يا الله
بالله عليكم الحال ده يرضي مين مش عارفة هاقدر اكمل القصة دي واللا ايه استودعكم الله

السبت، 11 أبريل 2009

حالة ملل ... قيد الانتظار

حالة ملل


سنين طويلة وانا قيد الانتظار
ولازلت
كنت اتابع التحركات
احيانا اغض البصر
واحيان اثور من الانفجار
هل ياتري سياتي يوما اراه فيه؟
هل سأجد نوره يشرق في عيني؟


وانتظرت وانتظرت وانتظرت
ولازلت
قيد الانتظار
ذات يوم
دق بابي طيف
فتحت له دون ان ادري كيف
سمعت منه
واحسست
اني الي الحياة عدت
ولكنه طيف
سرعان ما اختفي
وتركني
ابكي
وانتظر عودة ولا عودة
حبيبي
هل طال علي الامد؟
ام ان كل شي بقدر ؟
ولما جئت لي طيفا ولما تركتني للملل
ولولا ان حبك جزء من تكويني
لكنت تركت حبك وزهدت فيه
حبيبي
تعبت روحي من الانتظار
وبت اشكي من المرار
حبيبي
هل تسمعني في غربتك ؟

هل وصلك كلام قلبي لقلبك؟

أم انه
مجرد طيف انتظر ومجرد وهم
وهم الانتظار؟؟؟

الأحد، 5 أبريل 2009

سامحوني ... كان غصب عني

مش عارفة ابدا منين لكن هابدا
بقالي فترة طويلة في نفس المشكلات
نفس الضغوط
نفس الاعباء
محدش مرتاح في حياته
وكل واحد ادري بهمه
بس غصب عني
لان صوابعك مش زي بعضها
فكل واحد له قدرة تحمل
سامحوني .. غصب عني اني اتعصب عليكم وانتو قريبين مني
انتو ادري الناس بهمي
انتو عارفين الظروف واللي مش عارف حاسسني
الملامة مش في طبعي بس الظروف اقوي مني
مش بلوم غير العزيز القريب مني وقلبي
كل واحد له همومة وكل واحد له طاقته
وانا غصب عني تعبت حمل تعبت شيل هموم
انا غصب عني بقول تعبت غصب عني بقول يا همي
بستني يوم الرحمة ويوم الراحة امتي يجيني
بستني لحظة احس الفرحة
فرحة لقا الجنة نصيبي
سامحوني لو زعلت حد فيكم سامحوني
انا من يوم ما اتولدت وشلت كفني علي يميني
والحزن في الدنيا كان من قسمتي ونصيبي
سامحوني لو كلامي في يوم جرحكم
ده الجراح شي في تكويني
سامحوني لو بكيتكم
ده البكا بختي ونصيبي
لو سامحتوني وفهمتوا قصدي
هاتقدرو وتعذروني
خلاص تعبت من الملامة وتعبت من قلة الحيلة
هاستني منكم كلام يقول انكم سامحتوني
او حتي رد بجواب يقبل مني اعتذاري