الخميس، 30 نوفمبر 2023

حكاية جاون 3

السلام عليكم
عاملين ايه
تعبانين بسببي طبعا
بس اعمل ايه عايزة افضفض واطلع اللي جواية وخنقني من اللي بيحصل حواليا
يمكن تفتكروا انها مواقف شخصية
لكن بجد ده مثال حي عشته عن الاحداث اللي بتحصل في المستشفي
يعني حاجة كدة من الحياة عشان اكون عبرة لمن يعتبر
المهم بقي نيجي لحلقة النهاردة

تغيير علي الجرح

الدكتور وانا خارجة من المستشفي كتب لي تقرير ومعاد نزع الحشو زي ما بيقولو او الفتيل زي ما سميته انا
المعاد كان بعد تلات ايام
تلات ليالي من الصحيان والالم والحقن وخلافه
تصورو
انفي محشي بالقطن والشاش وكنت عايزة اعطس
وعطست .......ههههههههههههه........
بس طبعا مفيش رزاز
جه اليوم اللي هانزع فيه الفتيل
ههههههههههه
رحت العيادات الخارجية
ساحة الانتظار للمرضي
صوت الممرضة ( يا جماعة المتابعة بعد الساعة 12 ) ، ( العمليات دلوقتي )، ( الكشف الاوضة التانية)
فضلت منتظرة المعاد
ونادو عليا
ودايما كان دكتور محمد عبدالفتاح ( النائب اللي عملي العملية ) يقولي تعالي يا ماجدة .. اقوله انا نبيلة مش ماجدة
يقولي ولا تزعلي
كرر الحكاية دي كتير قوي
المهم ناداني ودخلت الغرفة والباب اتقفل علشان الناس اللي في الانتظار ميسمعوش الصوت ولا يتالمو لالمي
يا خسارة
دكتور عبدالفتاح انشغل وجاني دكتور تاني من اللي كانو في العمليات
كان المساعد بتاعه
جبار
بلا قلب
قعد علي الكرسي اللي قدامي
ونظر علي الادوات وسحب الجفت
وبكل قوة ارفعي راسك فوق
وبالجفت نزع اللاصق عن انفي
ااااااااااااااااااه
: اه ايه هو انا لسه عملت حاجة ، اهدي يا ماما
علي فكرة الدكتور ده من سني بس فيه شئ من العجرفة ربنا يستر علي الناس منها
وبالجفت وبدا يسحب الفتيل ::: قصدي الحشو اللي جوة انفي
مش عارفة اوصف واللا ايه
هو شريط شاش مضفر داخل جانبي الانف المفروض انه مغطس بالسافلون او المطهر عشان يثبت الخيط والدعامة وكمان يمتص الدم النازف
غصب عني بشئ من التلقائية بدات اساعدة في نزع الحشو
تصوروا
ماما مكنتش مقدرة مدي صعوبة الحالة
اول مرة اشوف دموعها علي خدها لما شافت الطبق ملياااااان دم
قالي اطلعي علي الحوض واملي انفك بالماء وانثريه
يلا كتير يا ماجدة
اااااااااااااااااااااااه من الالم مش قادرة اقوله ارحمني انا اسمي نبيلة
المهم فضلت كتير والمية متلجة احنا كنا في يناير يا نااااااااااااس
رجعت تاني علي الكرسي
بكل قسوة حط لي فتيل تاني
وقالي اطلعي برة خمس دقايق
عايزة اقولكم انه كان بيحط فتيل ويشيله مرة واثنين وثلاثة
لحد ما ساب الاخير ده فترة
وكل مرة كان بيدخله كنت بحس بمنشااااااااار بيدخل في دماغي
بيوصل لحد قمة راسي
اااااااااااااااااااااه
طلعت في الانتظار وانا منهارة
تصدقو
امي اخدتني في حضنها لمدة ربع ساعة واكتر وهي بتحاول تخبي دموعها
اعصابي هديت شوية
حاجة غريبة
تليفون من زملائي في رسالة بيطمنوا عليا
والاغرب اني رديت
هههههههههههههههههههه
مجنونة يظهر
يلا دخل الدكتور عبد الفتاح اللي كان انشغل بحالة في الغرفة التانية
شافني قاعدة في الانتظار ناداني
قالي تعالي انت لسه هنا
قولتله دكتور محمد قالي استني شوية برة
قالي لا تعالي
ويا الله علي ده دكتور
هو جراح صحيح
بس ايده بلسم
والله ما حسيت بالفتيل وهو بينزعه
ولا بيحطه
ولا اي حاجة
اقصد ان الالم كان خفيييف جدا لدرجة اني ما حسيت بيه
ماشاء الله عليه ربنا يحميه يارب ويبارك فيه
زعلت قوي لما رجعت بعد فترة اسال عليه ( اقصد احدد العملية التانية ) ومش لقيته وعرفت انه خلص النيابة وانتقل لمكان تاني
المهم كدة خلص الغيار
قالي تيجي بعد تلات ايام عشان نشيل الدعامات بقي
ودي كانت اسهل من اللي فات
الحمد لله انها جت لحد كدة
فضلت عشر ايام في الموال ده
بس اخر يوم رحت ملقتش عبدالفتاح
لقيت محمد التاني ( بلا قلب )
اوووووووف منه
قالي كدة خلاص ونشوفك الاسبوع بعد الجاي لو فيه اي ملاحظة
بس بجد يا جماعة بيكلمني من طرف مناخيره
حد صعب قوي
قولتله انا عايزة بس شهادة عشان اخد اجازة من الشغل
كنت وقتها في جمعية رسالة مسئولة عن فرز الملابس المستعملة
وكان لازم شهادة عشان اقدر اواصل شغلي
وكمان عشان تبقي اجازة مرضية
شخط فيا قوي وقالي ماقولتيش ليه من الاول
وكتب لي ورقة بعشر ايام
اللي هي كانت فترة المتابعة
وقالي انزلي علي شئون المرضي وسلميها وكملي الاجراءات
وخلاص علي كدة
ربنا يسامحه
بلا رحمة
بلا قلب
اكيد فيه زيه كتير
وفيه اصعب منه كمان
بس ده في نظري
بجد
مش اكتر من مشرط جراح
لكن روح الجراح
ماتت
نزعوها من صدره قبل ما يحلف اليمين
تحياتي
لو عايزين احكي العملية التانية
في انتظار بالموافقة اقصد التعليق
اشوفكم علي خير

الأحد، 14 أغسطس 2022

مين أفسد مصر

مين اللا أفسد مصر وغير ملامحها 
مين اللي قال الشعبي يكون مصنوع بقلة الضمير 
مين قال العيش علشان رخيص يتملى مسامير 
مين اللي بدل الجودة بالكتير 
مين اللي عمل من البشر مسخ وأشباه ادميين
مين اللي أفسد مصر 
مين اللي علم الساعي أنه ياخد فوق اجره فيطمع ويعتبره حقه ولما يجي ياخد حقه يعترض ويقول دا أقل من حقه 
مين قال إن عامل النضافة ياخد بقشيش ماهو اصلا وظيفته اللي سعى لها وتعين فيها جمع اكياس القمامة ومين اللي كرمش له وعوده أنه دا الطبيعي ف بقي يعتبر اللي مابيدلوش هو الوحش اللي بيعامله وحش 
مين اللي قال إن الأصل ف التعليم الكتب الخارجية والمذكرات والدروس الخصوصية 
مع بداية المدارس والجامعات كان المجانية والكتب الضخمة اللي الطالب يقعد يذاكر فيها وميشتريش كانت فيه دار الكتب ومكتبة الكلية ومكتبة الجامعة 
واللي المنطقي تطورت لكتب وأبحاث عالانترنت انت تذاكر منها وتلخص اللي قراته وفهمته بنفسك لنفسك 
مش علشان صاحبك يحفظ الملخص 
مين اللي قال الفساد هو الأصل 
والغلط هو الصح 
مين اللي أفسد مصر 
مين اللي قال انك لما تركب كاميرات ف محل تراقب بيها محل جارك وتشوف مين دخل له وتسلط عليه صبيك يسحبه ويقوله اديلك ارخص 
مين اللي قال إن الأصل المريض يدخل المستشفي الحكومي يتقاله اطلع اشتري العلاج من بره 
مين اللي قال الأصل ف العمليات أولوية اللي يدفع مش الأشد خطورة 
مين اللي قال إننا ناكل السحت والحرام
مين اللي قال الرشوة أساس الكلام 
مين اللي قال الزرع يموت علشان تعيش الديدان 
مين اللي قال نقلع جذور النخل علشان نزرع برتقال 
مين اللي قال نخلع بلاط الشوارع علشان نبني سور السلم والا نبلط منور البيت 
مين اللي قال إنه مال سايب 
مين اللي قال إنها فلوس الحكومة اصلا دي فلوس ربنا 
والا مين اللي قال إن ربنا له عندنا ركوع وسجود وكلام تمتمة ومالوش فروض علم وعمل وإحسان وسعي 
مين اللي علم ابنه اعمل كل الموبقات واشرب مخدرات وازني واقتل بس صيام اثنين وخميس والصلوات الصوان 
مين اللي غرس جذور الفساد ف تراب مصر 
مين اللي بدر بذور الفساد ف بيوت مصر 
مين أفسد مصر

الاثنين، 8 أغسطس 2022

بستعجب

بستعجب على أحوال الخلائق 
الصراط المستقيم المحفوف بالشوك 
دا حسب كلام المروعين المرعبين 
هو ازاي فسروا لقد خلقنا الانسان في كبد على أنها مشقة ورجعوا قالوا الشمس في كبد السماء يعني وسط يعني هي الشمس تبقي مش ف مشقة ؟؟ 
وبعدين هو ازاي الإنسان مخلوق علشان يشقى بس وربنا هو هو اللي قال ما ودعك ربك وماقلى 
وبردوا قال سخر لكم 
شوف كام سخر لكم وكام حاجة سخرها
يبقي ازاي خلقنا علشان نتعذب ونشقا ونحفر ف الصخور 
ازاي يبقي فيه ناس أقصي تعب لها تغيير لون البشرة من حمام الشمس 
وتقولوا ربنا خلقنا نتعب ونشقا 
ازاي ناس تبقي ماشية بالاذى والضرر وناس تبقي خير ومتعرفش تعيش
ازاي يفسروا ايات بر الوالدين أن غضبهم يقطع رحمة ربنا وف نفس الوقت هتتسأل عن عمرك وعلمك وعملك 
طب ازاي وهما رضاهم ف قلة علمك وقلة عملك وضياع عمرك ف انتظار اختياراتهم ليك وقبول العادي  

الثلاثاء، 19 يوليو 2022

بالذمة دا حلال

قصة انك تشوف صاحبك ناجح ف تجري وتسرق فكرته وتاخد من زبائنه وتقطع عليه بقت متكررة 
مثلا خالد فتح محل كشري والناس جريت تاكل عنده وتقول طعمه لذيذ وخالد بدأ ينشغل عن أصحابه بالمحل والزبائن قام محمد صاحب خالد وابن حتته اجر المحل اللي على ناصية الشارع وعمل ديكور احسن من خالد وفتح محل كشري ومش بس كدة دا ضرب سعر خالد علشان يجر الزبائن له 
هو عبدالسلام لمعت الحكاية ف دماغه وقال بقي العيال الشحاتين اللي كانوا بيستلفوا مني السيجارة يشتغلوا ويعملوا فلوس وانا اقعد كدة لا والله لاعمل احسن منهم وهوب (بفلوسي ياكلاب) عمل خمس محلات ف نفس المنطقة الموضوع وسع وكل واحد قلد صاحبه وبقي بين كل محل كشري والتاني بيت 
وقيس بقي على كدة 
الست زينب ام سعيد بتاعة اللبن اللي جوزها مات وسايب لها اربع عيال ف عين العدو وفكرت تخدم عيالها وتسعى على رزقهم بدل الشحاته والذل للعباد راحت اتفقت مع مزرعة لبن أنها تبيع لهم وتاخد نسبة وعلشان الأيتام دول ربنا كرمها والرزق الحلال... الجيران بقي مش يشجعوها بدأوا يتكلموا عن الخير اللي بقت فيها وراحوا يسألوها وهي بحسن نية قالت عالحكاية وتفاصيل المشروع قامت ام حمادة اللي جوزها مهندس ف الكويت قالت وانا يعني اقل منها وجريت علي نفس المزرعة واتفقت معاهم تاخد حصة بس المرة دي بفلوسي مش أجل زي ام سعيد ف خدت بونص وخصم عالكاش وراحت تبيع أضعاف وهكذا ام عبده عرفت هي كمان طلعت جري وعملت نفس الفكرة فتلاقي الكل ياعيني مش لاقي مشتري لأنهم قاصدين يسرقوا رزق بعض قال وشايقينها حلال 
كل واحد مفكرش يعمل فكرة تضيف للتاني 
كان ممكن أصحاب خالد يفكروا ف مشروع تاني زي فول وفلافل مثلا والا عصير قصب ويبقي بيخدم عاللي شغال ويستنفع ويسترزق هو كمان بس مكنش الفكر رزق قد ماهو قطع رزق 
ام حمادة لو كانت فكرت أنها تعمل مشروع تصنيع اللبن زبادي والا جبنة وكانت تشتري من ام سعيد وخدمتها ف رزقها واسترزقت هي كمان وفتحوا بيوت عمالة تحت ايدهم 
لكن لا الفكر كانت قطع رزق وحقد عالرزق 
بالذمة دا حلال ؟؟؟

الاثنين، 5 يوليو 2021

عصر ‏من ‏النفاق

من السهل أن تعيش ميتا ولكن من الصعب أن تعيش حياّ
من السهل أن تعمل في بيئة غير صالحة للعمل، بيئة قاتلة للطموح، بيئة مميتة للإنسانية ولكن من الصعب أن تصل لمبتغاك .. أن تحصل علي الحياة والرخاء 
هل هذا لأننا في عصر من النفاق وغياب الاخلاق .. ام اننا من اوقعنا أنفسنا في هذا الشرك ومن ثم اخذتنا العزة بالاثم فنزلنا بوابل من اللوم والقاء عثراتنا علي شماعة المحيطين 
هل المجتمع حولنا لا يقبل غير الافاقين المتسلقين وأصحاب اللسان المعسول وماسحين الجوخ كما يقال .. أم أننا فقط أخطأنا الطريق والقينا بأنفسنا وسط محيط من المنافقين العابثين علي سلم السلطة والوصولية 
كلما التفت حولي وجدت النفاق صعودا وهبوطا ذهابا وإيابا ... حتي اعتقدت أنني في عصر من النفاق

الاثنين، 21 يونيو 2021

مغامرات ‏اطفالي

طنط شمس 
ميس شمس 
الاسم اللي بدأت اتعرف بيه لما فتحت مكتبتي (مكتبة شمس) .. الاولاد كانوا بيحبوا يقعدوا معايا يحكولي كيف كان يومهم بالمدرسة ومواقفهم اللطيفة مع اصحابهم
ويسمعوا مني قصص وحكايات في التاريخ والجغرافيا والتربية الوطنية ... أو يتفرجوا عليا وانا بعمل مجسم تعليمي 
فترة المكتبة كانت خصبة جدا بالمواقف والمغامرات مع اطفال من بيئات مختلفة وخلفيات مجتمعية وثقافية مختلفة 
مرة قررت اعمل رحلة للاطفال زي الرحلة اللي لسه طعمها جوايا لحد دلوقت 
اه والله رحلة الحضانة 
كنا بنغني احنا يا هنانا اطفال الحضانة ... شوفوا سعادتنا مع أبلة بتاعتنا .......
يااااه جميل. 
واعلنت عن الرحلة البسيطة للاطفال بدون تدخل من أولياء الأمور ... كانت رحلة لمتحف اثار تل بسيطة ونادي الطيران 
تكلفة بسيطة ومكان مش بعيد عن المكتبة علشان الأهالي بردوا تكون مطمئنة علي اولادها بالإضافة إلي أنها رحلة علمية مش ترفيهية 
بمجرد الإعلان لقيت استجابة حلوة قوي وقفات باب الحجز والجو يومها كان ممتع لا حر ولا برد 
ورغم قرب المسافة الا اني عملتها رحلة بنفس نظام الرحلات يعني تجمع في مقر المكتبة وسندوتشاتك واتوبيس صغنون ونزول طابور وصعود طابور 
ومرشد وتوجيه 
وسبحان الله كانت رحلة مثمرة جدا للاطفال وأهلهم وليا انا كمان 
لقينا ترحيب من إدارة المتحف بفكرة المكتبة ووجودنا باعتبار أننا جهة غير حكومية وباعتبار أنه مسمي مكتبة اخد صورة تجارية لبيع الادوات الدراسية فقط ودا اللي مكنش نشاطي ولا طبيعة مكتبتي 🥳
المتحف خصص لنا ارشاد سياحي يجيد التعامل مع الاطفال والمرشدة نفسها كانت فرحانة بينا جدا .. حتي زوار المكان كانوا منبهرين بينا وطلبوا مننا ينضموا لينا ف الرحلة ويتعرفوا اكتر 
المسئولين ف المتحف عملوا حاجة لطيفة جدا وكانت مفاجأة أنه فيه قاعة سينما داخل المتحف بتعرض فيلم وثائقي عن تاريخ المتحف ومنطقة الشرقية بشكل عام وتاريخ وحضارة مصر بشكل اعم
خلصنا المتحف وجه معاد الذهاب لنادي الطيران وبالرغم من أنه في الجهة المقابلة لمتحف اثار تل بسطة الا اني حرصت علي المحافظة علي نكهة رحلة ومزارات مختلفة يعني تنقل بالاتوبيس 
وفعلا ركبنا واتحركنا بس السواق كان لذيذ ومتعاون جدا ولف لآخر الشارع ورجع تاني بالاولاد علشان يحسسهم أننا انتقلنا من مكان لآخر 
..... يتبع

الثلاثاء، 15 يونيو 2021

نعمة ‏الاحساس ‏

الاحساس نعمة كلمة كثيرا ما اسمعها لكن لم اجدها عند غالبية الناس 
الغريب في الأمر ليس فقط ندرة هذه النعمة ولكن في التنمر الواقع علي صاحب هذه النعمة.
فإذا اجتمعت بعدد من الأشخاص وكان بينهم شخصية من أصحاب الاحساس الذين يتأثرون فرحا وألما وحزنا بكل شيء حتي لو كان ليس بهم اجد بقية الجمع يصب عليه وابل من عبارات التنمر والاستهزاء والسخرية.
هذا الأمر ليس مرتبط بمرحلة عمرية معينة أو جنس او عرق محدد أو لغة فالغالبية علي هذا النمط مهما علا أو دنا 
فاقدين لنعمة الاحساس 
والاعجب في الأمر أنهم لا يشعرون بفقدانهم هذه النعمة .. فإذا كانت الصحة تاج على رؤوس الاصحاء لا يراه الا المرضي فالاحساس نعمة لا يراها الا مالكيها....