انا اسمي مواطن
عايش في مدينتي الجميلة
مدينتي اسمها سما الحب لانها بالفعل قطعة سماء علي الارض ومتشبعة بالحب
مدينتي في صحراء مصر الغربية قرب الوادي الجديد مساحتها حوالي مليون فدان لو احكي لكم عن الجمال فيها تفتكروا اني بحكي عن حبيبة او زوجة وليست مدينة من مدن مصر الجديدة
والدي كان دايما يحكي عن التخطيط العمراني اللي تم من اجل المدينة وكيف كان يعمل مع زملائه في التصميم والانشاء
الحكاية بدأت بفكر شباب ودعوات الاباء والامهات الصالحات بتيسير الاحوال
الشباب دول هما والدي ووالدتي واصدقائهم اللي قرروا انهم يقدموا طلب هجرة للصحراء والحمد لله كان معاهم خطة عمل رائعة الحكومة وافقت عليها ووفرت لهم بعض المساعدات المادية
كانوا شباب مكافح الحكومة ساعدتهم بكل ما طلبوه وهما كان عليهم التصميم والاصرار
بدأو بعمل حزام اخضر محيط بالمدينة اشجار نخل بعرض قيراط وبامتداد حدود المدينة في الوقت ده بدات تنزل دعوة لكل شباب دبلوم الزراعة الحديث التخرج والقديم ذوي الخبرة بالانتقال للعيش هنا وابتكار محاصيل وطرق للزراعة واستغلال الاراضي في زراعة الزيتون والعنب والرمان والنخل وكمان حسن استغلال الاراضي الجوفية في المنطقة
الحكومة بقي في الحكاية دي جابت التقاوي اللي رشحها الشباب الزراعيين اصل والدي واصحابه كانو خريجي كليات مختلفة اللي زراعة واللي تجارة واللي هندسة واللي طب وغيره علشان كدة وضعوا خطة تنموية ماتخرش المية زي ما بيقولوا
تاني خطوة عملوها الصرف والمياه والكهرباء وطبعا الحكومة عملت انتداب لكتير من الانشائيين والمعدات علشان تبني وتعمر لكنها عملت تفويض سلطة للشباب المتميزين دول الحفر والانشاء كان بعمق حوالي عشر متر وكانت في شكل غرف تحت الارض كانها مدينة تحت المدينة اللي لسه لم يتم انشائها الفكرة كانت تعرض علي شاشات التليفزيون كانه مشروع قومي رائع مدينة متكاملة اسمها سماء الحب
في نفس الوقت كان بيتم اقامة مباني علي ارض المدينة بتصميم متميز عبارة عن بيوت ذات طوابق اربعة كل بيت علي مساحة 200م مقسم الي شقتين في الدور ومحاطة بمساحة عشرة متر من الزروع ورود واشجار كأنها جنينة تحيط بالبيت ولما المدينة بدأت تعمر بالسكان فيه ناس زرعت خضار وفاكهة في الجنينة دي علشان توفر
تالت حاجة بدأو في تنفيذها كانت الخدمات مجمع المستشفي ومجمع المدارس ومبني خدمات الشرطة وغيره من الانشاءات عندنا في اخر الشارع مجمع خدمات حكومية ده مبني بيجمع موظفين من جهات حكومية متعددة بس كلها الكترونية يعني كأنك داخل سيبر كدة بتدخل تقعد علي الجهاز في غرفة وتكتب اللي انت عايزة والكمبيوتر بيفتح لك موقع الجهة اللي انت عايزها وتملي البيانات المطلوبة لاستيفاء الاجراءات وبعدها تنتقل لغرفة استلام ودي عاملة زي ماكينة الصراف الالي بعد عشر دقائق من كتابة البيانات في غرفة التقديم بتظهر عند الاستلام اما البيان اللي انت طالبة او تقرير او كود بموعد الاجراء
اما المدارس بقي دي حكاية
انا بحب مدرستي قوي
المجمع طبعا من اول رياض الاطفال حتي الثانوية مبني كبير للتعليم الابتدائي فيه 8 فصول في الدور ومبني كبير للاعدادي ومبني كبير للمكتبة ومبني كبير للتعليم الصناعي ومبني تاني للتعليم الزراعي ومبني تالت للتعليم التجاري الفني ومبني للثانوي العام ومبني صغير لرياض الاطفال كل المباني دي شكلهم زي الدائرة الكبيرة بداخلها مساحة فارغة كبيرة لممارسة الانشطة بين كل مبني والتاني اما حديقة العاب صغيرة او ملعب كرة قدم خماسي او حمام سباحة
المدرسين كلهم كانو واخدين عهد علي نفسهم بان المدينة تكون مختلفة والجيل الجاي يكون احسن لما عملو مجلس ادارة المدرسة وقرروا المناهج وتوزيعها احسنوا بجد
مدرس الرياضيات خريخ كلية التربية قسم رياضيات بس اخد كمان سنة اعدادي في كلية الهندسة او خريج هندسة واخد سنة في كلية تربية
ومدرس العلوم خريج كلية العلوم واخد كمان سنة تربوية في كلية التربية
مدرس العربي خريج اداب لغة عربية
ومدرسة الاقتصاد المنزلي خريجة اقتصاد منزلي
مدرس الدين انا بحبه قوي لانه صوته حلو في تلاوة القرأن الكريم وصاحبي احمد سأله مرة عن دراسته وقال انه خريج كلية اصول دين جامعة الازهر وانه درس في معهد الدعاة وبعدها اخد دبلومة في تربية الاطفال وعمل دراسات عليا في ترغيب الاطفال في حفظ القرأن الكريم احكام التلاوة علشان كدة احنا بنحبه وبنحب نحفظ القرأن ودي اكتر حصة بنحبها
مش بس كدة ده ميشيل زميلنا في الفصل هو حنا ومينا وبيمن مدرس الدين بتاعهم علشان هما بيدرسوا دين مسيحي المدرس بتاعهم راهب من الدير بيعلمهم تعاليم السيد المسيح وتلامذته علي احسن وجه وبطريقة تخليهم يحبوا دينهم ويحبو السلام
علشان تبقي دراسة الدين علي اصوله
اما بقي مدرسين الانجليزي واللغات التانية كانوا في مرحلة الابتدائي خريجي كلية السن
عندنا كمان في المدرسة في مبني المكتبة دور اسمه دور المواهب وده عبارة عن مسرح كبير وغرف جانبية المسرح بيقام عليه حفلات نهاية العام الدراسي والتكريم والمسابقات الدورية الثقافية في المدرسة وغيره من التجمعات والغرف دي غرف للتدريب وفيها ادوات موسيقية ولوحات وادوات للرسم والجميل ان فريق التدريس المسئول عن المواهب هو فريق من الشباب خريجي فنون جميلة وفنون تطبيقية وهما فنانين مشهورين في عالم الرسم والنحت والتمثيل والغناء والعزف والتلحين
الملاعب مسئول عنها فريق من خريجي تربية رياضية او ابطال رياضيين في مجالهم يعني المسئول عن تعليم السباحة هو سباح معروف ومساعدينه من الشباب اللي تدربوا علي ايده
عندنا في المدرسة فيه ضيف كل يوم خميس في كل المجالات انا بحب يوم الخميس ده علشان بيكون يوم جميل بيكون يوم مسابقات في كل المجالات في الشعر والادب والفن والرياضة وكمان المناهج الدراسية وبنقدم فيه ابحاث او ملخصات كتب قرأناها واصحابي في مكتبة المدرسة من اول الاسبوع
وعرفت انهم قرروا يعملوا دورات تدريبية لتنمية مهاراتهم وتحديث وتطوير امكانياتهم كل المدرسين بيتصلوا باصحابهم علي الانترنت المهتمين بالدراسة والتربية والتطوير ويعزموهم علي زيارة للمدينة يشاهدوا معالم التطورات في الاعمار وكمان ينظموا ليهم دورات تدريبية ويتعلموا الجديد من الابتكارات في مدينتنا سماء الحب
الخدمة الصحية متوفرة في المدرسة للطلبة والمدرسين عندنا مبني طبي متخصص فيه اطباء متنوعين وحكيمات وممرضات واجهزة هايلة للاسعافات الاولية والاجراءات البسيطة والكشف الدوري علي الطلبة والمدرسين والتطعيمات والتحصينات
اجمل حاجة في مدينتي فعلا ان الناس كلها اجتمعت علي الحب والعطاء
بابا واصحابه لما وضعوا خطة المدينة وضعوها خطة استراتيجية تعمر مليون سنة وقالوا ان اللي الانشاءات لابد تكون مدروسة حتي لا تظهر اخطاء تعرقل المسيرة
جزيرة الطريق اللي في كل شارع عبارة عن حديقة عامة طويلة جدا بطول الشارع لكن عرضها حوالي عشرة متر مزروعة باشجار متنوعة كل شارع في نوع معين من الشجر غير التاني الزيتون الاخضر والليمون والياسمين وعصفور الجنة والورد البلدي وشجر الفلفل وغيره
وفي كل شارع الشباب اللي فيه صبيان وبنات هما المسئولين عن الزروع والاشجار دي ومتابعتها وجمع محصولها وبيبيعوا المحصول في النهاية اما في السوق او لادارة استصلاح الاراضي ويكون ثمن المحصول ده هو اجرهم عن المجهود طول فترة الزراعة
كل شارع في مدينتي اسمه باسم الشجرة المزروعة فيه يعني شارع الزيتون او شارع الليمون وشارع الياسمين وغيره
واما مجمع الاجهزة الحكومية فاسم الشارع شارع الخدمات
المستشفي عبارة عن مجموعة من المباني بكل التخصصات وكل دور في المستشفي مكتوب باسم طبيب او عالم شهير وعلي بوابة كل دور فيه لوحة كبيرة مكتوب فيها نبذة عن العالم ده وانجازاته علشان الناس تعرفه والاطباء والمساعدين من كل التخصصات وفي كل انواع المساعدة ناس بتحب ربنا وبتعمل كل شي تقدر تعمله
انا فاكر يوم ماعملت الزائدة الدودية وكنت مريض جدا شوفت الناس في المستشفي مقدرتش افرق بين الطبيب والعامل في حسن المعاملة وكلهم كانوا بيجروا علشان يعملوا العملية ولما فوقت من البنج طلبوا من والدي استكمال بعض الاجراءات لانه ليس من الاصول ان تتوقف حياة انسان علي اجراءات ومصاريف
وكمان صديقي بيمن لما اصيب بالتهاب اللوزتين ودخل المستشفي علشان يستأصلهم الطبيب ابلغ والدته انه سوف يتم دفع مبلغ 200 جنيه كتأمين للعملية ولما ابلغته ان المبلغ ليس متوافر معها وقت وجودها بالمستشفي والحالة كانت لا تسمح بالتاجيل وقع الطبيب باعفاء بيمن من المبلغ وقال لوالدته حين يتوفر معكي تبرعي به لخدمة العمليات هنا
احنا بنروح المدرسة ماشيين علي اقدامنا علي الرصيف وانا ماشي بحس بتناغم شديد كل الشوارع بتتجمع في مكان واحد اطفال وناس كتير من كل الاعمار الدراسية كل عمر له زي موحد وكلنا بنخرج من بيوتنا في اتجاه واحد هو المدرسة شكلنا جميل قوي واحنا ماشيين الصبح زي الطابور علي الرصيفين وكمان الساعة 4 العصر واحنا راجعين من المدرسة في اتجاه بيوتنا
مجمع المستشفي كمان شكله جميل دائري مثل مجمع المدارس ومحتوياته بين كل مبني نفس المحتوي حمام سباحة وحدائق كتير وملاعب للمرضي والموظفين
عرفت كمان ان فيه عساكر من الشرطة بكونو في الشوارع انا بشوف عمو العسكري الصبح ولما برجع من المدرسة بشوف واحد تاني انا عارف انه بيكون في الكابينة بتاعته اللي في اول الشارع بس كل شوية اشوفه بيتمشي في الشارع رايح جاي
ولما سالت ماما قالتلي انه ده امن علشان الحماية وعلشان لو حد طلب استغاثة يلاقي العسكري موجود بسرعة
انا نسيت اقول ان المجمعات دي في كل حي بس انا قولت اللي في الحي بتاعنا احنا
احنا بندرس جغرافيا مدينتي ومحافظتي في سنة اولي وتانية ابتدائي بنتعرف فيه علي شوارع ومساحات والحاجات الجميلة اللي في مدينتنا ومحافظتنا
وبندرس في تالتة ابتدائي جغرافيا مصر كلها
ولما وصلت سنة رابعة كنت بدرس جغرافيا الوطن العربي وعلشان الوطن العربي كبير وفيه تنوع كبير كنا درسنا افريقيا العربية في سنة رابعة ودرسنا الوطن العربي في اسيا في سنة خامسة
ولما وصلنا سنة سادسة ابتدائي درسنا قارات العالم وافريقيا
لما وصلت سنة اولي اعدادي كنت بدرس جغرافيا كل اللي درسته في ابتدائي بس من خلال كتب المكتبة يعني جمعنا اكبر قدر من المعلومات من الكتب وبنتعلم ازاي نعمل ابحاث في الجغرافيا
ونفس الحكاية كانت في التاريخ بدانا بحكاية اعمار بلدنا مدينة سما الحب وبعدين تاريخ مصر الحديث والقديم بالتفصيل وكنا بنقرا كتب من المكتبة عن التاريخ كنا بنسمع حكايات المدرس وكنا بنحفظ الارقام والتواريخ واسماء الابطال
دلوقتي انا في كلية هندسة اعدادي في جامعة الوادي الجديد اول عام دراسي فيها هذا العام
انا ممكن اكتب في بلادي اشعار وامشي في شوارع اوروبا وامريكا واقول بلدي اجمل واحلي وتعالوا شوفو بلادنا وانتو تحسوا بالغيرة وتتمنوا تكونوا زينا
تزرعوا وتحصدوا
مدينتي مش بس زراعية لا دي كمان فيها مصانع عندنا مصانع غزل ونسيج ومصانع اغذية ومصانع في كل المجالات الصناعية بس في منطقة اسمها المناطق الصناعية كلها استثمار مصري كل رجال الاعمال المصريين لما شافوا بابا واصحابه الشباب متحمسين وعرفوا المشروع المتميز ساعدوهم وشاركوهم بالبناء والتعمير وعملوا دعوة لكل الحرفيين انهم يقيموا في المدينة بشكل منظم
انتاج المصانع والمزارع كان في الاول اكتفاء ذاتي دلوقتي بدانا نصدر للمدن المجاورة وياريت يعملوا مثلنا
عارفين عندنا كام مزرعة حيوانية وداواجن اربعة كباااااار قوي من كل نوع من انواع المزارع
وكمان كل حي في المدينة فيه منحل عسل
المركز التجاري بتاع الشارع بتاعنا كبير وفيه منتجات متنوعة وكلها صنع في مدينة سماء الحب
بابا وماما اخدونا نزور بيت جدي القديم في القاهرة يااااااااه فرق كبير بين المدينتين
واحنا في الطريق مررنا علي مدينة اسيوط الجديدة وزرنا بيت عمي في مدينة العبور وخالي في 6 اكتوبر بس انا حبيت مدينتنا اكتر وعرفت كمان ان المدن دي كلها لم تتم علي تخطيط استراتيجي طويل المدي
وبعد ما حكيت ليكم قليل من كتير عن مدينتي
تحبوا تيجوا تعيشوا معانا
لو عايزين تعرفوا اكتر اسالوني وانا اجاوب
وممكن ابعت لكم الصور كمان علي الاميل
تحياتي
