النت وبلاويه واللي بيجري فيه

حاجة غريبة قوي

الناس اللي عملو النت عملوه علشان يسهل ليهم حياتهم واحنا المفروض نستخدمه في ده بس ايه هي السهولة في نظرنا
احنا عرب متربيين علي تقاليد وعادات لازم نحافظ عليها وبرده متعلمين ومثقفين بدليل اننا بنتابع التطور بس للاسف السهولة عندنا يعني استخدام الادوات دي في الغلط اللي كان صعب علينا زمان
نت ، موبايل ، وحاجات تانية كتير
النت والموبايل بقو موضه دلوقتي
كل شوية حمادة بتعمل ايه بذاكر علي النت يا ماما وهو فقط بيعمل شات وياريت شات هادف ده بيدور علي البنات ويتصاحب عليهم ولانك متقدرش تعرف شخصية اللي ورا الكلام تلاقي الكدب مش باين من كتره علي الشات والولد يدخل باسم بنت علشان ينادي بنت محترمة ويتكلم معاها وبعد شوية يصارحها انه شاب ومعجب يا سلام
وبعدين يقضي وقت طويل في التسلية ولما يدخلو في الجد يخلع بحسب كلام الشباب
واللا حتي المواقع المخلة اللي تخليك تتفرج علي افلام قلة الادب وصور البنات العرايا ومشاهد الاغتصاب وغيره وغيره
والموبايل يا سلام اغاني وبلوتوث وكاميرا علشان اصور اللي يعجبني وانا قاعد في المطعم واللا حتي اسرق المحاضرة وانا في الكلية وغيره كتير طبعا

( اسهل حاجة هاجيب شريحة اعاكس بيها البنت وارميها ولا حد يعرف عني حاجة )
هي دي السهولة عندنا
طيب وخدمات رجال الاعمال في ادارة شركاتهم اللي في اماكن مختلفة
وتوفير الطباعة باكثر من نسخة والرسايل اللي تطمن الاهالي علي اولادهم في خارج البلد
طيب والقراة للكتب الالكترونية
طيب طلبة الطب اللي ممكن يتابعو العمليات الجراحية المصورة
الدراسات العليا وانظمة البحث العلمي
نشرات الاخبار والصحف العربية والاجنبية اللي لو اشتريتها تكلفك غالي معاك اهه بالمجان
اه صحيح دا النت للعب بس
(النت للهيافة
النت اوبس بنت بتتكلم علي النت
مفيش بنت محترمة علي النت
مفيش بنت بتدخل تقول كلام اسلامي
لالالالالالا

حتي رجال الاعمال شبابنا المصريين في الخارج بيدخلو علي النت علشان بس يعوضوا اليوم اللي تعبو فيه في تسلية باي طريقة من طرق التسلية
تصوروا

بس انا مش كدة
الحمد لله الذي هدانا لهذا
انا بدخل علي النت وعارفة انا بعمل ايه
بعمل شات ..اه فعلا بعمل شات؟؟ ايوة !! بعمل شات مع مين ولاد !!!!
يعني اختلاط
خد بالك الاختلاط موجود في بيتك
بس انت مش بتشوف غير الغلط في ايد الناس
انت تحكم بنفسك
اي نوع من الاختلاط ممنوع
- حسن والاء وحسام ومحمد الوصيفي وخديجة ..... مش دول الشباب اللي بكلمهم علي النت
- اه
- ليه
- علشان دول اكاديمية الهدف وبنجتمع وناخد قرارتنا ونخطط ليومنا الجاي سوا بما يخص الاكاديمية
- بس خد بالك العيش والملح اللي اكلناه يخلينا نتكلم سوا عن صحتنا ودراستنا ومشاريعنا الشخصية زي اي حياة عادية واي شباب عادي

- اسلام ومها ومدام ليلي ..... يووووووووه دول فريق جمعية نهر الحياة
- نسيت اننا بشارك في تاسيس دار ايتام نهر الحياة بمجهودي
- انتي بتاخدي 300 جنيه بحالهم
- يا سلاااااااام دا انا بصرف قدهم مرتين احيانا مواصلات واللا انت شايف اني مش عندي التزامات واللا المبلغ ده كافي لحد في سني وظروفي
- خلاص خلاص سيبك من موضوع المرتب ده احنا دلوقتي في النت واللي بيحصل فيه
- حاضر
- هو دول بس اللي علي الماسنجر بتاعك
- لا فيه ناس معرفهمش وفيه ناس اعرفهم - فيه ناس من صناع بنها وجمعية رسالة بنها وفيه ناس كمان من رسالة الزقازيق وفيه ناس مش فاكرة عرفتهم منين بس مش بتكلم معاهم ببعت لهم بس اذاكار ورسايل دينية ونصائح يعني صدقة خفية من اللي بيقولو عليها
- خلاص يا ستي مش عايز اعرف الباقي العينة بينة

- طيب ماشي الحال ثبت بالبينة انها بنت عادية ونسمع معاها الاغنية دية ( البنت طلعت جدعة بجد ... مهمهاش في العالم حد )